കൽപ്പറ്റ : വയനാട് ജില്ലയിലെ നിയമസഭ തെരഞ്ഞെടുപ്പിൽ യു.ഡി.എഫിന് ലഭിച്ച തിളക്കമാർന്ന വിജയം, എതിരാളികളായ സി.പി.എം നടത്തിയ വ്യക്തിഹത്യാരോപണങ്ങൾക്ക് ജനങ്ങൾ നൽകിയ ശക്തമായ മറുപടിയാണെന്ന് യു.ഡി.എഫ് നേതാക്കൾ വാർത്താസമ്മേളനത്തിൽ പറഞ്ഞു. വോട്ടർമാർക്കും പ്രവർത്തകർക്കും നന്ദി രേഖപ്പെടുത്തിയ നേതാക്കൾ,ജില്ലയിലെ സമഗ്ര വികസനത്തിന് പ്രതിജ്ഞാബദ്ധമാണെന്നും അറിയിച്ചു.കൽപ്പറ്റ മണ്ഡലത്തിലെ സ്ഥാനാർഥി അഡ്വ.ടി.സിദ്ദിഖിനെയും സുൽത്താൻബത്തേരി മണ്ഡലത്തിലെ ഐ.സി.ബാലകൃഷ്ണനെയും ലക്ഷ്യമിട്ട് സി.പി.എം നടത്തിയ ആരോപണങ്ങൾ തിരഞ്ഞെടുപ്പിൽ നേട്ടമുണ്ടാക്കാനായിരുന്നുവെങ്കിലും,വോട്ടർമാർ അത് തള്ളിക്കളഞ്ഞതായി നേതാക്കൾ വ്യക്തമാക്കി. സുൽത്താൻബത്തേരിയിലും കൽപ്പറ്റയിലും യു.ഡി.എഫ് നേടിയ വിജയം അതിന്റെ തെളിവാണെന്നും അവർ കൂട്ടിച്ചേർത്തു.
മാനന്തവാടിയിൽ ഉഷാവിജയന്റെ വൻവിജയം, വികസന വാഗ്ദാനങ്ങളിൽ ജനങ്ങൾക്കുണ്ടായ നിരാശയുടെ പ്രതിഫലനമാണെന്ന് യു.ഡി.എഫ് വിലയിരുത്തി.പുതിയ സർക്കാർ രൂപീകൃതമായാൽ ജനഹിതം മുൻനിർത്തി വികസന പദ്ധതികൾ നടപ്പിലാക്കുമെന്നും,Rahul Gandhi പ്രഖ്യാപിച്ച പദ്ധതികൾ നടപ്പാക്കുമെന്നും അറിയിച്ചു.
ദുരന്തബാധിത പ്രദേശങ്ങളിലെ ജനങ്ങളുടെ അസന്തോഷം തിരഞ്ഞെടുപ്പിൽ പ്രകടമായതായി അഡ്വ.ടി.സിദ്ദിഖ് പറഞ്ഞു.മുണ്ടക്കൈ,ചൂരൽമല മേഖലകളിലെ ബൂത്തുകളിൽ യു.ഡി.എഫിന് ലഭിച്ച വൻ ഭൂരിപക്ഷം അതിന്റെ തെളിവാണെന്നും അദ്ദേഹം പറഞ്ഞു.പുനരധിവാസം,ചികിത്സ,വായ്പമാഫി തുടങ്ങിയ വിഷയങ്ങളിൽ സർക്കാർ പരാജയപ്പെട്ടുവെന്നും അദ്ദേഹം ആരോപിച്ചു.
ഐ.സി. ബാലകൃഷ്ണൻ പറഞ്ഞു: അടിസ്ഥാനരഹിതമായ ആരോപണങ്ങൾ ഉയർത്തിയ എൽ.ഡി.എഫിന് വോട്ടർമാർ ശക്തമായ തിരിച്ചടി നൽകിയിരിക്കുകയാണ്. ജനങ്ങൾ സത്യാവസ്ഥ തിരിച്ചറിഞ്ഞ് വോട്ടിലൂടെ മറുപടി നൽകിയതായും അദ്ദേഹം കൂട്ടിച്ചേർത്തു.
മാനന്തവാടി നിയോജകമണ്ഡലത്തിലെ നിയുക്ത എം.എൽ.എ ഉഷാവിജയൻ,ആരോഗ്യ മേഖല ഉൾപ്പെടെയുള്ള വിഷയങ്ങൾക്ക് മുൻഗണന നൽകുമെന്ന് അറിയിച്ചു.മെഡിക്കൽ കോളേജിന്റെ അടിസ്ഥാന സൗകര്യങ്ങൾ മെച്ചപ്പെടുത്തുകയും, കാർഷിക പ്രശ്നങ്ങൾക്കും വന്യമൃഗ ശല്യത്തിനും പരിഹാരം കാണുമെന്നും അവർ പറഞ്ഞു.
വയനാടിന്റെ സമഗ്ര പുരോഗതിക്കായി എം.പി Priyanka Gandhiയുടെ പിന്തുണ പ്രയോജനപ്പെടുത്തുമെന്നും യു.ഡി.എഫ് നേതാക്കൾ വ്യക്തമാക്കി.ജില്ലയിലെ എല്ലാ മണ്ഡലങ്ങളിലും ചരിത്ര വിജയം സമ്മാനിച്ച വോട്ടർമാർക്കും പ്രവർത്തകർക്കും നേതാക്കൾ വീണ്ടും നന്ദി അറിയിച്ചു.
