മാനന്തവാടി : കേശദാനം സ്നേഹദാനം എന്ന ആപ്തവാക്യവുമായി ടീം ജ്യോതിർഗമയ കാൻസർ രോഗികൾക്ക് സൗജന്യ വിഗ്ഗ് വിതരണം നടത്തുന്നതിനായി സമാഹരിച്ച കേശങ്ങളുടെ സമർപ്പണം നടത്തി.കേശദാന രംഗത്ത് വർഷങ്ങളായി പ്രവർത്തി ക്കുന്ന കമില്ലസ് സെമിനാരിക്ക് കൈമാറുന്ന കേശം തൃശ്ശൂർ അമല ആശുപത്രിയിൽ എത്തിച്ച് വിഗ് നിർമിച്ച് കാൻസർ രോഗികൾക്ക് സൗജന്യമായി നൽകുകയാണ് ചെയ്യുന്നത്.വിദ്യാർഥിനികൾ അടക്കം നിരവധി യുവതീ യുവാക്കൾ കേശദാനം നടത്തുന്നുണ്ട്.മാനന്തവാടി വയനാട് സ്ക്കിൽ പാർക്കിൽ നടന്ന ചടങ്ങ് ബ്ലോക്ക് പഞ്ചായത്ത് പ്രസിഡൻ്റ് മീനാക്ഷി രാമൻ ഉദ്ഘാടനം ചെയ്തു.സ്കിൽ പാർക്ക് മാനേജിങ് ഡയറക്ടർ എ.വി.അനീഷ് അധ്യക്ഷത വഹിച്ചു,ടീം ജ്യോതിർഗമയ കോഓർഡിനേറ്റർ കെ.എം.ഷിനോജ് കണ്ണൂർ വിജിലൻസ് ഡി എഫ് ഒ എ.ഷജ്നക്ക് കേശങ്ങൾ കൈമാറി.സെൻ്റ് ജോർജ് യാക്കോബായ സുറിയാനി പള്ളി വികാരി ഫാ.ബേബി പൗലോസ്,യോഗാചാര്യൻ പ്രവീൺ ടി.രാജൻ,സ്കിൽ പാർക്ക് അഡ്മിനിസ്ട്രേറ്റർ സഞ്ജു ജോണി എന്നിവർ പ്രസംഗിച്ചു.ചടങ്ങിൽ സ്കിൽ പാർക്കിൻ്റെ പുതിയ ലോഗോ പ്രകാശനം ഹയർ സെക്കൻഡറി സ്കൂൾ കരിയർ ഗൈഡൻസ് സെൽ ജില്ലാ കോഓർഡിനേറ്റർ കെ.ബി.സിമിൽ നിർവഹിച്ചു.
