തൊഴിൽ വിപണിയുടെ ആവശ്യകത നിറവേറ്റുന്നതിന് നൈപുണ്യ വികസനം അനിവാര്യം:ഡോ.ഡി.എം മുലയ്

കൊച്ചി : വർദ്ധിച്ചു വരുന്ന തൊഴിൽ വിപണിയുടെ ആവശ്യകത നിറവേറ്റുന്നതിനായി നൈപുണ്യ വികസനവും മൾട്ടി സ്കില്ലിങ്ങും അനിവാര്യമാണെന്ന് നാഷണൽ സ്കിൽ ഡെവലപ്മെന്റ് കോർപ്പറേഷന്റെ മുഖ്യ ഉപദേഷ്ടാവ് ഡോ. ഡി.എം മുലയ്.
കൊച്ചിയിൽ സീഗൾ ഇൻസ്റ്റിറ്റ്യൂട്ട് ഓഫ് മാനേജ്മെന്റ് ആൻഡ് ടെക്നോളജി( സിമാറ്റ്) ആരംഭിച്ച കേരളത്തിലെ ആദ്യ എആർ,വിആർ അധിഷ്ഠിത ത്രിഡി എഡ്യുക്കേഷണൽ തിയറ്റർ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ആഗോളതലത്തിൽ വൈദഗ്ദ്ധ്യമുള്ള തൊഴിലാളികളുടെ ആവശ്യകത പ്രയോജനപ്പെടുത്താൻ യുവതലമുറയെ സജ്ജമാക്കുന്നതിന് ഓരോ പൗരനും ഉത്തരവാദിത്തമുണ്ട്.ദേശീയ, അന്തർദേശീയ നൈപുണ്യ ലക്ഷ്യങ്ങളുമായി വിദ്യാഭ്യാസത്തെ സമന്വയിപ്പിക്കുന്ന സീഗൾ ഇൻസ്റ്റിറ്റ്യൂട്ട് പോലുള്ള സംരംഭങ്ങളുടെ പ്രവർത്തനം മാതൃകാപരമാണെന്നും അദ്ദേഹം പറഞ്ഞു.

ഇന്ത്യ ഒരു സാമ്പത്തിക ശക്തി ആയി മാറിക്കൊണ്ടിരിക്കുന്ന ഈ കാലത്ത് 50% ജനങ്ങൾക്കെങ്കിലും നൈപുണ്യ വികസനം സർക്കാർ ഉറപ്പാക്കിയാൽ മാത്രമേ രാജ്യം മുന്നേറുകയുള്ളൂ എന്നും സീഗൾ എം.ഡി ഡോ. സുരേഷ്കുമാർ മധുസൂദനൻ പറഞ്ഞു.

സ്വദേശത്തും വിദേശത്തുമായി ഒട്ടനവധി തൊഴിൽ അവസരങ്ങളുള്ള ഓയിൽ ആൻഡ് ഗ്യാസ് എൻജിനീയറിങ്, ഫയർ ആൻഡ് ഇൻഡസ്ട്രിയൽ സേഫ്റ്റി,ലോജിസ്റ്റിക്സ് ആൻഡ് സപ്ലൈ ചെയിൻ മാനേജ്മെന്റ് എന്നീ മേഖലകളിലേക്ക് ഇൻഡസ്ട്രിയുടെ ആവശ്യകതയ്ക്ക് അനുസൃതമായ നൈപുണ്യമുള്ളവരെ വാർത്തെടുക്കുകയും തൊഴിൽ ഉറപ്പാക്കുകയുമാണ് സിമാറ്റിന്റെ ലക്ഷ്യമെന്നും അദ്ദേഹം പറഞ്ഞു.

വിദ്യാർത്ഥികൾക്ക് കാര്യങ്ങൾ കണ്ട് മനസിലാക്കുന്നതിനും വളരെ സൂക്ഷ്മമായി വിശകലനം ചെയ്യുന്നതിനും സഹായകമാകുമെന്നതാണ് ത്രിഡി എഡ്യുക്കേഷണൽ തിയറ്ററിന്റെ പ്രത്യേകത.
നാൽപ്പത് വർഷത്തോളമായി ആഗോളതലത്തിൽ മുൻനിരയിലുള്ള ടാലന്റ് അക്യുസിഷൻ കമ്പനിയായ സീഗൾ ഇന്റർനാഷണൽ ഗ്രൂപ്പിന്റെ സംരംഭമാണ് സിമാറ്റ്. കേന്ദ്ര വിദേശകാര്യമന്ത്രാലയത്തിന്റെ ഫൈവ് സ്റ്റാർ റേറ്റിങ്ങിൽ പ്രവർത്തിക്കുന്ന ഗ്രൂപ്പിന് കീഴിൽ ആരംഭിച്ച സിമാറ്റ് ആഗോളനിരവാരത്തിലുള്ള വ്യവസായാധിഷ്ഠിത വിദ്യാഭ്യാസത്തിൽ ശ്രദ്ധയൂന്നിയാണ് പ്രവർത്തിക്കുന്നത്. ട്രെയിനിംഗ് പൂർത്തിയാക്കുന്നവർക്ക് 100 ശതമാനം പ്ലേസ്മെൻ്റും നൽകുന്നുണ്ട്. കൂടാതെ ജർമൻ, ജപ്പാൻ, ഇംഗ്ലീഷ് തുടങ്ങിയ ഭാഷാ ട്രെയിനിംഗ് പ്രോഗ്രാമും സിമാറ്റിൽ ലഭ്യമാണ്.

ചടങ്ങിൽ ടി. ജെ വിനോദ് എം.എൽ.എ, ഇന്ത്യൻ പേഴ്സണൽ എക്സ്പോർട്ട് പ്രൊമോഷണൽ കൗൺസിൽ പ്രസിഡന്റ് വി.എസ് അബ്ദുൾ കരീം, കൺസ്യൂമർ പ്രൊട്ടക്ഷൻ ഫോറം മെമ്പർ സാധന ശങ്കർ ,ഐ.ആർ.എസ്,ഏരീസ് ഗ്രൂപ്പ് സി.ഇ.ഒ സോഹൻ റോയ് എന്നിവർ പങ്കെടുത്തു.