• admin

  • January 31 , 2020

ജനീവ : കൊറോണ വൈറസ് പടര്‍ന്നു പിടിക്കുന്നതിന്റെ പശ്ചാത്തലത്തില്‍ ആഗോള ആരോഗ്യ അടിയന്തരാവസ്ഥ പ്രഖ്യാപിച്ച് ലോകാരോഗ്യ സംഘടന. ആരോഗ്യ മേഖലയില്‍ പുരോഗതി കൈവരിച്ചിട്ടില്ലാത്ത രാജ്യങ്ങളിലേക്ക് കൊറോണ വൈറസ് പടരുമോ എന്ന ആശങ്കയാണ് ആഗോള ആരോഗ്യ അടിയന്തരാവസ്ഥ പ്രഖ്യാപിക്കാനുള്ള പ്രധാന കാരണമെന്ന് ഡബ്ല്യുഎച്ച്ഒ തലവന്‍ ട്രഡോസ് അദാനം പറഞ്ഞു. ലോകത്താകമാനമായി 9700 പേര്‍ക്കാണ് രോഗം സ്ഥിരീകരിച്ചിട്ടുള്ളത്. ഇതില്‍ ബഹുഭൂരിപക്ഷവും ചൈനയിലാണ്. ചൈനയ്ക്ക് പുറത്ത് 20 രാജ്യങ്ങളില്‍ രോഗം സ്ഥിരീകരിച്ചിട്ടുണ്ട്. ഏറ്റവും അവസാനമായി സ്ഥിരീകരിച്ചത് ഇന്ത്യയിലും ഫിലിപ്പിന്‍സിലുമാണ്. ലോക ആരോഗ്യ സംഘടന രോഗം ബാധിച്ച രാജ്യങ്ങളുടെ പട്ടികയില്‍ ഇന്ത്യയെ ഉള്‍പ്പെടുത്തി. സ്ഥിതി ഗൗരവതരമാണെന്നും ആരോഗ്യ അടിയന്തരാവസ്ഥ സംബന്ധിച്ച് ഐക്യരാഷ്ട്ര സഭാ അംഗരാജ്യങ്ങളിലേയ്‌ക്കെല്ലാം നോട്ടീസ് നല്‍കുമെന്നും ലോക ആരോഗ്യ സംഘടന തലവന്‍ പറഞ്ഞു. രാജ്യാതിര്‍ത്തികള്‍ അടയ്ക്കുന്നതും വിമാനങ്ങള്‍ റദ്ദാക്കുന്നതും അടക്കമുള്ള കാര്യങ്ങളില്‍ അതാത് രാജ്യങ്ങള്‍ക്ക് തീരുമാനമെടുക്കാം. എന്നാല്‍ നിലവിലെ സാഹചര്യത്തില്‍ അന്താരാഷ്ട്ര വിമാനസര്‍വ്വീസുകള്‍ റദ്ദാക്കേണ്ട സാഹചര്യമില്ലെന്നും ഡബ്ല്യു. എച്ച്. ഒ. വ്യക്തമാക്കി. ഇതിനിടെ കൊറോണ വൈറസ് ബാധയെ തുടര്‍ന്ന് ചൈനയിലെ മരണം 213 ആയി. ചൈനയ്ക്ക് പുറത്ത് കൊറോണ വൈറസ് ബാധിച്ച് ഇതുവരെ മരണമുണ്ടായിട്ടില്ല. വുഹാന്‍ നഗരത്തില്‍ നിന്ന് സ്വന്തം രാജ്യത്തേക്ക് മടങ്ങിയവരിലാണ് ചൈനക്ക് പുറത്ത് കൂടുതലും വൈറസ് ബാധ റിപ്പോര്‍ട്ട് ചെയ്തത്. എന്നാല്‍, മനുഷ്യനില്‍ നിന്ന് മനുഷ്യനിലേക്ക് പടര്‍ന്ന എട്ട് കേസുകളാണ് ജര്‍മനി, ജപ്പാന്‍, വിയറ്റ്നാം, യുഎസ് എന്നിവിടങ്ങളില്‍ റിപ്പോര്‍ട്ട് ചെയ്തത്. ലോകത്തിന്റെ വിവിധ ഭാഗങ്ങളിലായി 8,100 പേര്‍ക്ക് കൊറോണ വൈറസ് ബാധ സ്ഥിരീകരിച്ചു.