• Lisha Mary

  • April 1 , 2020

ന്യൂയോര്‍ക്ക് : ലോകമാകെ ഭീതിപരത്തി കോവിഡ്-19 അതിവേഗം പടരുന്നു. വെറും എട്ട് ദിവസങ്ങള്‍കൊണ്ട് ലോകമാകെയുള്ള കോവിഡ്-19 രോഗികളുടെ എണ്ണം എട്ട് ലക്ഷം കടന്നു. ഒരാഴ്ച മുമ്പ് ലോകമാകെയുള്ള കോവിഡ് രോഗികളുടെ എണ്ണം നാല് ലക്ഷമായിരുന്നു. അമേരിക്ക, ഇറ്റലി, സ്‌പെയിന്‍ തുടങ്ങിയ രാജ്യങ്ങളില്‍ രോഗപ്പകര്‍ച്ച തീവ്രമായതാണ് ഇതിന് കാരണം. കഴിഞ്ഞ ചൊവ്വാഴ്ച 18,000 പേരാണ് രോഗം ബാധിച്ച് മരിച്ചതെങ്കില്‍ ഇപ്പോള്‍ മരണസംഖ്യ 42,000 കടന്നു. മാര്‍ച്ച് മാസത്തിലാണ് കോവിഡ് കേസുകളുടെ എണ്ണത്തില്‍ വന്‍ വര്‍ധനവുണ്ടായത്. രോഗം ആദ്യം തിരിച്ചറിഞ്ഞ അന്നു മുതല്‍ രോഗികളുടെ എണ്ണം ഒരു ലക്ഷത്തിലെത്തിയത് 67 ദിവസം എടുത്താണ്. ഇവയില്‍ ഏറെയും ചൈനയില്‍ നിന്നാണ്. എന്നാല്‍ രണ്ട് ലക്ഷത്തിലേക്കെത്താന്‍ വെറും 11 ദിവസം മാത്രമാണ് വേണ്ടിവന്നത്. നാലു ദിവസങ്ങള്‍ക്കൊണ്ട് അത് മൂന്നുലക്ഷവും മൂന്നു ദിവസത്തിനുള്ളില്‍ ആകെ കോവിഡ് ബാധിതരുടെ എണ്ണം നാലുലക്ഷവുമായി ഉയര്‍ന്നു. എന്നാല്‍ ഒരാഴ്ച കൊണ്ട് നാലു ലക്ഷം പേരിലേക്ക് അധികമായി വൈറസ് പടര്‍ന്നു. ഇതിനിടെ ഇറ്റലിയില്‍ 24 മണിക്കൂറിനിടെ 743 പേര്‍ രോഗം ബാധിച്ച് മരിക്കുന്ന ഞെട്ടിക്കുന്ന തലത്തിലേക്ക് രോഗവ്യാപനം തീവ്രമായി. ഇറ്റലിയില്‍ രോഗബാധിതരുടെ എണ്ണം ഒരു ലക്ഷത്തിനടുത്തെത്തി. അമേരിക്കയ്ക്ക് പുറമെ യൂറോപ്യന്‍ രാജ്യങ്ങളിലും രോഗം അതിവേഗമാണ് പടരുന്നത്. നിലവില്‍ ലോകമെമ്പാടും 42,139 ആളുകളോളം കൊറോണ ബാധയെ തുടര്‍ന്ന് മരിച്ചിട്ടുണ്ട്. 858,000 ആളുകളിലാണ് നിലവില്‍ കൊറോണ സ്ഥിരീകരിച്ചിരിക്കുന്നത്. അമേരിക്ക, ഇറ്റലി എന്നീ രാജ്യങ്ങളില്‍ കൊറോണ ബാധിതരുടെ എണ്ണം ഒരു ലക്ഷം കടന്നു.