കല്‍പ്പറ്റ : വയനാട് ലോക്സഭാ മണ്ഡലം യു ഡി എഫ് സ്ഥാനാര്‍ഥി പ്രിയങ്കാഗാന്ധിയുടെ തെരഞ്ഞെടുപ്പ് പ്രചരണാര്‍ത്ഥം അഡ്വ. ടി സിദ്ധിഖ് എം എല്‍ എയുടെ നേതൃത്വത്തില്‍ കല്‍പ്പറ്റ നഗരസഭയിലെ പുത്തൂര്‍വയല്‍ മേഖലയില്‍ ഗൃഹസന്ദര്‍ശന ക്യാംപയിന്‍ നടത്തി. രാവിലെ എട്ട് മണി മുതല്‍ പുത്തുര്‍വയല്‍ അങ്ങാടിയിലും, തുടര്‍ന്ന് വീടുകളിലുമെത്തി എം എല്‍ എ അഭ്യര്‍ത്ഥന കൈമാറി വോട്ടഭ്യര്‍ത്ഥിച്ചു. തുടര്‍ന്ന് സമീപപ്രദേശമായ മാങ്ങാവയലിലും യു ഡി എഫ് പ്രവര്‍ത്തകര്‍ക്കൊപ്പമെത്തി എം എല്‍ എ ഭവനസന്ദര്‍ശനം നടത്തി.പ്രിയങ്കാഗാന്ധി അഞ്ചുലക്ഷത്തിലേറെ വോട്ടിന്റെ ഭൂരിപക്ഷത്തില്‍ വിജയിക്കുമെന്ന് അദ്ദേഹം പറഞ്ഞു. പരമാവധി ആളുകളെ നേരില്‍ കണ്ട് കഴിഞ്ഞ തവണത്തേക്കാള്‍ പോളിംഗ് ശതമാനം വര്‍ധിപ്പിച്ചു ഭൂരിപക്ഷം ഉറപ്പാക്കുമെന്നും അദ്ദേഹം കൂട്ടിച്ചേര്‍ത്തു. രാഹുല്‍ഗാന്ധിക്കുള്ള അതേ ആത്മബന്ധമാണ് പ്രിയങ്കാഗാന്ധിക്കും വയനാടിനോടുള്ളത്. തിങ്കളാഴ്ച വീണ്ടും പ്രിയങ്കാഗാന്ധി വയനാട്ടിലെത്തുന്നതോടെ തെരഞ്ഞെടുപ്പ് പ്രചരണരംഗത്ത് കൂടുതല്‍ ആവേശവും ഉത്സാഹവുമുണ്ടാകുമെന്നും അദ്ദേഹം പറഞ്ഞു. നിലവില്‍ മണ്ഡലത്തില്‍ തെരഞ്ഞെടുപ്പ് പ്രചരണത്തില്‍ എന്‍ ഡി എയും എല്‍ ഡി എഫും ചിത്രത്തില്‍ തന്നെയില്ലാത്ത സാഹചര്യമാണെന്നും സിദ്ധിഖ് കൂട്ടിച്ചേര്‍ത്തു. യു ഡി എഫ് മുന്‍സിപ്പല്‍ കണ്‍വീനര്‍ ഗിരീഷ് കല്‍പ്പറ്റ, ഡി സി സി ജനറല്‍ സെക്രട്ടറി സി ജയപ്രസാദ്, മുന്‍സിപ്പല്‍ കൗണ്‍സിലര്‍ ജൈന ജോയി, യു എ ജെറീഷ്, പി ടി റഷീദ് തുടങ്ങിയവരും എം എല്‍ എക്കൊപ്പമുണ്ടായിരുന്നു.
