തിരുവനന്തപുരം :
കാട്ടാക്കട കാഞ്ഞിരംവിള സ്വദേശി സംഗീതിനെ മണ്ണുമാഫിയ മണ്ണുമാന്തി യന്ത്രം ഉപയോഗിച്ചു കൊലപ്പെടുത്തിയ കേസില്‍ നാലു പൊലീസ് ഉദ്യോഗസ്ഥർക്ക് സസ്പെൻഷൻ. എഎസ്ഐ അനിൽകുമാർ, സിപിഒമാരായ ഹരികുമാർ, ബൈജു, സുകേഷ് എന്നിവരെയാണ് റൂറൽ എസ്പി സസ്‌പെൻഡ് ചെയ്തത്. മണ്ണുമാഫിയ വീട്ടിലെത്തി അതിക്രമം കാണിക്കുന്നതായി പരാതി നല്‍കിയിട്ടും പൊലീസുകാര്‍ സ്ഥലത്തെത്തിയിരുന്നില്ല. പൊലീസിന്റെ ഭാഗത്ത് വീഴ്ചയുണ്ടായതായി നെടുമങ്ങാട് ഡിവൈഎസ്പി റിപ്പോര്‍ട്ട് നല്‍കിയിരുന്നു.
സംഗീതിന്റെ മൂന്നു വാരിയെല്ലുകളാണ് മണ്ണുമാന്തി യന്ത്രത്തിന്റെ ബക്കറ്റ് ഉപയോഗിച്ചുള്ള അടിയില്‍ പൊട്ടിയത്. തന്റെ വസ്തുവില്‍നിന്ന് മണ്ണു കടത്തുന്നതറിഞ്ഞ് സ്ഥലത്തെത്തിയ സംഗീത്, കാര്‍ കൊണ്ടിട്ട് വഴി തടസപ്പെടുത്തി. പൊലീസ് വന്നിട്ടു പോകാമെന്ന് സംഗീത് പറഞ്ഞപ്പോള്‍ മണ്ണുകടത്തു സംഘം കാര്‍ തള്ളിമാറ്റി ടിപ്പറിനും മണ്ണുമാന്തി യന്ത്രത്തിനും പോകാന്‍ വഴിയൊരുക്കി. എതിര്‍ത്ത സംഗീതിനെ ആദ്യം ടിപ്പര്‍ കൊണ്ട് ഇടിച്ചു. തറയില്‍വീണ സംഗീത് എഴുന്നേറ്റ് വീണ്ടും തടയാന്‍ ശ്രമിച്ചപ്പോള്‍ മണ്ണുമാന്തി യന്ത്രത്തിന്റെ പിന്‍വശത്തെ ബക്കറ്റ് ഉപയോഗിച്ച് നെഞ്ചിലും തലയിലും അടിച്ചു. ഇടിഞ്ഞുവീണ മതിലിനടിയിലേക്ക് സംഗീത് വീണപ്പോള്‍ സംഘം വാഹനങ്ങളുമായി കടന്നു.
വിജിനാണ് കേസിലെ ഒന്നാം പ്രതി. മണ്ണുമാന്തി യന്ത്രത്തിന്റെ ഉടമ ചാരുപാറ കോട്ടേക്കോണം വീട്ടില്‍ സജു, ടിപ്പര്‍ ഉടമ കിഴമച്ചല്‍ പത്മിനി നിവാസില്‍ ഉത്തമന്‍, ടിപ്പര്‍ ഡ്രൈവർ കൊല്ലക്കോണം കുഴിവിള വീട്ടില്‍ ലിനു, ടിപ്പറിന്റെ ക്ലീനര്‍ കൂവളശേരി റോഡരികത്തുവീട്ടില്‍ മിഥുന്‍, ബൈജു, ടിപ്പര്‍ ഒളിപ്പിക്കാന്‍ സഹായിച്ച ലാല്‍കുമാര്‍, വിനീഷ് എന്നിവരെയും പൊലീസ് അറസ്റ്റു ചെയ്തിരുന്നു. സംഗീതിനെ ഇടിച്ച മണ്ണുമാന്തി യന്ത്രം കുഴലാര്‍ മുളയംകോട് ഭാഗത്തുള്ള വിജിന്റെ പഴയ പാറ ക്വാറിയില്‍നിന്നും, ടിപ്പര്‍ തമിഴ്‌നാട്ടിലെ മേപ്പാല എന്ന സ്ഥലത്തെ ഹോളോബ്രിക്‌സ് കമ്പനിയില്‍നിന്നും കണ്ടെത്തി. സംഭവം നടക്കുമ്പോള്‍ ടിപ്പര്‍ ഓടിച്ചത് ലിനുവും മണ്ണുമാന്തി യന്ത്രം ഓടിച്ചത് വിജിനുമാണ്.
സംഗീതിനെ ഇടിച്ചിട്ടശേഷം പ്രതികളായ ഉത്തമന്‍, ലിനു, മിഥുന്‍ എന്നിവര്‍ സ്‌കൂട്ടറില്‍ ഉദിയന്‍കുളങ്ങരയിൽ എത്തി. ലാല്‍കുമാര്‍ വാടകയ്‌ക്കെടുത്ത വാഹനത്തില്‍ മൂന്നുപേരെയും തമിഴ്‌നാട്ടിലെ തൃപ്പരപ്പിലുള്ള ലോഡ്ജിലെത്തിക്കുകയായിരുന്നു. സംഗീതുമായി പ്രതികള്‍ക്കു നേരത്തെ ഇടപാടുണ്ടായിരുന്നതായി പൊലീസ് പറഞ്ഞു. വനം വകുപ്പിനായി സംഗീത് മണ്ണു നല്‍കിയിരുന്നു. സംഗീത് കൊല്ലപ്പെട്ട ദിവസം അനുവാദമില്ലാതെയാണ് മണ്ണ് എടുത്തത്. 5 ലോഡ് മണ്ണ് വസ്തുവില്‍നിന്നു കൊണ്ടുപോയി. മണ്ണെടുക്കുന്ന വിവരം ഭാര്യ അറിയിച്ചതനുസരിച്ചാണ് സംഗീത് സ്ഥലത്തെത്തിയതും തര്‍ക്കത്തെത്തുടര്‍ന്ന് കൊല്ലപ്പെട്ടതും.
കൂടത്തായി പ്രതി ജോളി ജയിലില്‍ ആത്മഹത്യയ്ക്ക് ശ്രമിച്ചു
പ്രാര്‍ത്ഥനകള്‍ വിഫലം; ദേവനന്ദയുടെ മൃതദേഹം കണ്ടെത്തി
പോസ്റ്റ്‌മോര്‍ട്ടം പൂര്‍ത്തിയായി; ദേവനന്ദയുടേത് മുങ്ങിമരണമെന്ന് പ്രാഥമിക നിഗമനം
കേരളത്തിലും കൊറോണ
അപകടമുണ്ടാക്കിയ കണ്ടെയ്‌നര്‍ ലോറിയുടെ ഡ്രൈവര്‍ കീഴടങ്ങി
കോവിഡ് മരണം വീണ്ടും ; ഇന്ത്യയില്‍ മരണം മൂന്നായി
