• Lisha Mary

  • March 7 , 2020

തിരുവനന്തപുരം : അന്താരാഷ്ട്ര വനിതാദിനാഘോഷത്തിന്റെ സംസ്ഥാനതല ഉദ്ഘാടനവും വനിതാരത്ന പുരസ്‌കാരവിതരണവും ഇന്ന് വൈകിട്ട് നാലിന് നിശാഗന്ധി ഓഡിറ്റോറിയത്തില്‍ മുഖ്യമന്ത്രി പിണറായി വിജയന്‍ നിര്‍വഹിക്കും. വനിത ശിശുവികസന മന്ത്രി കെ.കെ. ശൈലജ യോഗത്തില്‍ അധ്യക്ഷത വഹിക്കും. ചടങ്ങില്‍ സര്‍ഗ അവാര്‍ഡ്, നൈറ്റ് വാക്ക് അവാര്‍ഡ്, വെബ്സൈറ്റ് ഉദ്ഘാടനം, വിമണ്‍ പോര്‍ട്ടല്‍, ആനിമേഷന്‍ സീരീസ് ലോഞ്ച്, പത്മശ്രീ നേടിയ വനിതകളെ ആദരിക്കല്‍, മികച്ച വനിതാ സംരംഭകരെ ആദരിക്കല്‍, ഐസിഡിഎസ് അവാര്‍ഡ്, കലാപരിപാടികള്‍ തുടങ്ങിയവ നടക്കും. രാവിലെ പത്തിന് സംസ്ഥാനത്തെ ആദ്യ വണ്‍ ഡേ ഹോമിന്റെ ഉദ്ഘാടനം തമ്പാനൂര്‍ ബസ് ടെര്‍മിനല്‍ എട്ടാം നിലയില്‍ മന്ത്രി കെ.കെ. ശൈലജ നിര്‍വഹിക്കും. പെണ്‍കുട്ടികള്‍, അമ്മമാരോടൊപ്പമുളള 12 വയസുവരെയുളള ആണ്‍കുട്ടികള്‍ എന്നിവര്‍ക്കായായാണ് തലസ്ഥാനത്ത് വണ്‍ ഡേ ഹോം ആരംഭിച്ചത്. എല്ലാ ദിവസവും 24 മണിക്കൂറും പ്രവര്‍ത്തിക്കുന്ന വണ്‍ഡേ ഹോമാണ് സജ്ജമാക്കിയിരിക്കുന്നത്. മേയര്‍ കെ. ശ്രീകുമാര്‍ അധ്യക്ഷത വഹിക്കും. രാജ്യത്ത് തന്നെയുള്ള ആദ്യ സംരംഭമാണിത്. രാത്രി 10ന് നിശാഗന്ധിയില്‍ നിന്നും കിഴക്കേകോട്ട ഗാന്ധി പാര്‍ക്കിലേക്ക് രാത്രി നടത്തം ഉണ്ടായിരിക്കും. ഡിസംബര്‍ 29ന് നിര്‍ഭയ ദിനത്തില്‍ ആരംഭിച്ച രാത്രി നടത്തം സംസ്ഥാനത്തിന്റെ വിവിധ ഭാഗങ്ങളില്‍ നടന്നു വരികയാണ്. ജില്ലാ വനിത ഓഫീസര്‍മാരുടെ നേതൃത്വത്തില്‍ വ്യാപാരി വ്യവസായി കൂട്ടായ്മ, റസിഡന്‍സ് അസോസിയേഷന്‍, കുടുംബശ്രീ, അയല്‍ക്കൂട്ടങ്ങള്‍ എന്നിവരുടെ സഹകരണത്തോടെ രാത്രി നടത്തം സംഘടിപ്പിച്ചിരിക്കുന്നത്. ഇതോടൊപ്പം നൈറ്റ് ഷോപ്പിംഗും സംഘടിപ്പിച്ചിട്ടുണ്ട്. എല്ലാ ജില്ലകളിലും നൈറ്റ് വാക്ക് ഉണ്ടായിരിക്കും. രാത്രി നടത്തം ഗാന്ധിപാര്‍ക്കില്‍ എത്തിയ ശേഷം വിവിധ കലാപരിപാടികള്‍ അരങ്ങേറും. മാര്‍ച്ച് എട്ടിന് വനിതാ പുലരി ആഘോഷങ്ങളോടെയാണ് വനിതാ വാരാചരണത്തിന്റെ സമാപനം.