• Lisha Mary

  • April 13 , 2020

തിരുവനന്തപുരം : സംസ്ഥാനത്ത് ലോക്ക്ഡൗണ്‍ ഇളവ് വരുത്തുന്നതില്‍ തീരുമാനം നീളുന്നു. ഇന്ന് ചേര്‍ന്ന മന്ത്രിസഭായോഗത്തിലും ഇത് സംബന്ധിച്ച് തീരുമാനമായില്ല. ബുധനാഴ്ച വീണ്ടും മന്ത്രിസഭ ചേരും. കേന്ദ്ര നിര്‍ദേശം ലഭിച്ചതിന് ശേഷമാകും ലോക്ക്ഡൗണ്‍ ഇളവില്‍ അന്തിമ തീരുമാനം. ഇന്നൊ നാളെയൊ കേന്ദ്രസര്‍ക്കാരിന്റെ തീരുമാനം വരുമെന്നാണ് പ്രതീക്ഷിക്കുന്നത്. അതിനാലാണ് ബുധനാഴ്ച വീണ്ടും മന്ത്രിസഭായോഗം ചേരാന്‍ തീരുമാനിച്ചത്. സംസ്ഥാനത്തെ കൊറോണ വൈറസുമായി ബന്ധപ്പെട്ട അവലോകനവും ഇന്ന് ചേര്‍ന്ന മന്ത്രിസഭാ യോഗത്തില്‍ നടന്നു. ഒരോ ജില്ലയുടെയും ചുമതലയുള്ള മന്ത്രിമാര്‍ ജില്ലയിലെ സ്ഥിതിഗതികള്‍ വിവരിച്ചു. സംസ്ഥാനത്ത് സ്ഥിതിഗതികള്‍ നിയന്ത്രണ വിധേയമാണെന്നും ആശ്വാസകരമാണെന്നുമാണ് മന്ത്രിസഭാ യോഗത്തില്‍ പൊതുവെയുണ്ടായ വിലയിരുത്തല്‍. എന്നാല്‍ ചൈനയില്‍ അടക്കം വൈറസ് പ്രത്യക്ഷപ്പെട്ട സാഹചര്യത്തില്‍ യാത്ര നിയന്ത്രണങ്ങള്‍ ഉള്‍പ്പെടെയുള്ളവ തുടരേണ്ടതുണ്ടെന്നാണ് വിലയിരുത്തല്‍. പ്രത്യേകിച്ച് ജില്ലകള്‍ കടന്നുള്ള യാത്ര ഒരു തരത്തിലും അനുവദിക്കില്ലെന്നും യോഗത്തില്‍ തീരുമാനമായി. അയല്‍ സംസ്ഥാനങ്ങളില്‍ പോസിറ്റീവ് കേസുകള്‍ വര്‍ദ്ധിക്കുന്ന സാഹചര്യത്തില്‍ കേരളം ജാഗ്രതയോടെ മുന്നോട്ട് പോകണമെന്നും തീരുമാനമായി.