• Lisha Mary

  • March 23 , 2020

വയനാട് : കോവിഡ് രോഗവ്യാപനം തടയുന്നതിന് സംസ്ഥാന അതിര്‍ത്തിക്ക് പുറമേ ജില്ലാ അതിര്‍ത്തികളിലും പരിശോധന കര്‍ശനമാക്കി. പോലീസിന്റെയും ആരോഗ്യവകുപ്പിന്റേയും നേതൃത്വത്തിലാണ് പരിശോധന. അടിയന്തിര സാഹചര്യമാണെന്ന് ബോധ്യമായെങ്കില്‍ മാത്രമേ മറ്റിടങ്ങളില്‍ നിന്നുളളവരെ വയനാട് ജില്ലയിലേക്ക് പ്രവേശിപ്പിക്കുന്നുളളൂ. പരിശോധനയ്ക്ക് ശേഷം മാത്രമെ ചരക്ക് വാഹനങ്ങളും കടത്തിവിടുകയുളളൂ.  എല്ലാവരും പരിശോധനയുമായി സഹകരിക്കണമെന്നും അനാവശ്യ യാത്രകള്‍ ഒഴിവാക്കണമെന്നും യാത്രക്കാര്‍ മതിയായ തിരിച്ചറിയല്‍ രേഖകള്‍ കൈവശം കരുതണമെന്നും ജില്ലാ പോലീസ് മേധാവി ആര്‍.ഇളങ്കോ അറിയിച്ചു. അതേസമയം വയനാട്ടില്‍ നിന്ന് കെ.എസ്.ആര്‍.ടിസി, സ്വകാര്യ ബസ്സുകള്‍ക്ക് മറ്റ് ജില്ലകളിലേക്ക് പോകുന്നതിന് നിയന്ത്രണമുണ്ടാവില്ലെന്ന് ജില്ലാ കലക്ടര്‍ ഡോ.അദീല അബ്ദുളള അറിയിച്ചു. കണ്ണൂര്‍, കോഴിക്കോട് ജില്ലകളില്‍ നിന്ന് സ്വകാര്യ ബസ്സുകള്‍ വരുന്നതിനും തടസ്സമുണ്ടാവില്ല. മറ്റ് ജില്ലകളില്‍ ക്വാറന്റയിന്‍ നിര്‍ദ്ദേശിക്കപ്പെട്ടവര്‍ വയനാട്ടില്‍ തങ്ങുന്നതായി വിവരം ലഭിച്ചതിന്റെ അടിസ്ഥാനത്തിലാണ് നിയന്ത്രണം ഏര്‍പ്പെടുത്തിയിട്ടുള്ളത്. അത്യാവശ്യ കാര്യങ്ങള്‍ക്ക് വരുന്നവരെ എവിടേയും തടഞ്ഞു നിര്‍ത്തില്ല. തിരിച്ചറിയല്‍ രേഖ സഹിതം സന്ദര്‍ശനത്തിന്റെ ആവശ്യം പോലീസിനെ അറിയിച്ചാല്‍ പ്രവേശനം അനുവദിക്കുന്നതാണ്. വയനാട്ടുകാര്‍ക്ക് മറ്റ് ജില്ലകളിലേക്ക് പോകുന്നതിനും തടസ്സമുണ്ടാവില്ലെന്നും കളക്ടര്‍ അറിയിച്ചു.