കൽപറ്റ : യാക്കോബായ സുറിയാനി സഭയുടെ പ്രാദേശിക തലവൻ ശ്രേഷ്ഠ കാതോലിക്ക ആബൂൻ മോർ ബസേലിയോസ് ജോസഫ് ബാവയ്ക്ക് 23ന് മലബാർ ഭദ്രാസനത്തിന്റെ ആഭിമുഖ്യത്തിൽ സ്വീകരണം നൽകുമെന്ന് സംഘാടക സമിതി ഭാരവാഹികൾ അറിയിച്ചു.ഓഗസ്റ്റ് 23 ശനിയാഴ്ച വൈകുന്നേരം 3 ന് മീനങ്ങാടി കത്തീഡ്രലിൽ ശമുവേൽ മാർ പീലക്സീനോസ് തിരുമേനിയുടെ കബറിടത്തിൽ ശ്രേഷ്ഠ ബാവ ധൂപ പ്രാർത്ഥന നടത്തും.തുടർന്ന് നിരവധി വാഹനങ്ങളുടെ അകമ്പടിയോടെ അനുമോദന സമ്മേളന വേദിയായ മൂലങ്കാവ് സെന്റ് ജോൺസ് യാക്കോബായ സുറിയാനി ദൈവാലയത്തിലേയ്ക്ക് ആനയിക്കും.
3:30 ന് ദൈവാലയ കവാടത്തിൽ ശ്രേഷ്ഠ കാതോലിക്കയ്ക്ക് സ്വീകരണം നൽകും.തുടർന്ന് പള്ളിയിൽ ധൂപപ്രാർത്ഥന നടക്കും.വൈകുന്നേരം 4 ന് നടക്കുന്ന അനുമോദന സമ്മേളനത്തിൽ മലബാർ ഭദ്രാസന മെത്രാപ്പോലീത്ത ഡോ.ഗീവർഗ്ഗീസ് മോർ സ്തേഫാനോസ് അധ്യക്ഷത വഹിക്കും.മന്ത്രി ഒ.ആർ. കേളു ഉദ്ഘാടനം ചെയ്യും.പ്രശസ്ത നടനും സംവിധായകനുമായ ബേസിൽ ജോസഫ് മുഖ്യപ്രഭാഷണം നടത്തും.
ഡോക്യുമെന്ററി പ്രകാശനം മാത്യൂസ് മോർ അഫ്രേം മെത്രാപ്പോലീത്തയും, സണ്ടേസ്കൂൾ സപ്ലിമെന്റ് പ്രകാശനം പൗലോസ് മോർ ഐറേനിയോസ് മെത്രാപ്പോലീത്തയും നിർവഹിക്കും.ഇടവക മെത്രാപ്പോലീത്തയുടെ നേതൃത്വത്തിൽ നടന്ന് വരുന്ന കൂട് ചാരിറ്റബിൾ സൊസൈറ്റിയുടെ ഭാഗമായി ഭവന നിർമ്മാണ സഹായം,വിവാഹ ധനസഹായം, വസ്ത്ര വിതരണം എന്നിവയും ചടങ്ങിനോടനുബന്ധിച്ച് നടക്കും.
‘തലചായ്ക്കാനൊരിടം’ എന്ന ഭവന പദ്ധതിയുടെ ഉദ്ഘാടനം മലങ്കര കത്തോലിക്കാ സഭയുടെ ബത്തേരി രൂപതാ അധ്യക്ഷൻ ഡോ. ജോസഫ് മാർ തോമസ് മെത്രാപ്പോലീത്ത നിർവഹിക്കും. ‘കരുതൽ’ വസ്ത്ര വിതരണ പദ്ധതി ഐ.സി. ബാലകൃഷ്ണൻ എം.എൽ.എ ഉദ്ഘാടനം ചെയ്യും. ‘മംഗല്യക്കൂട്’ വിവാഹ ധനസഹായ വിതരണം അഡ്വ.ടി.സിദ്ധീഖ് എം.എൽ.എ നിർവഹിക്കും. സഭാ കലണ്ടർ പ്രകാശനം നീലഗിരി എംഎൽഎ പൊൻജയശീലൻ നിർവഹിക്കും.
അനുഗ്രഹപ്രഭാഷണം ശ്രേഷ്ഠ കാതോലിക്ക ആബൂൻ മോർ ബസേലിയോസ് ജോസഫ് ബാവ നിർവഹിക്കും.സ്വീകരണ പരിപാടിയുടെ ഒരുക്കങ്ങൾ പൂർത്തിയായതായി ജനറൽ കൺവീനർ ഫാ. ഷിജിൻ കടമ്പക്കാട്ടിൽ,ഭദ്രാസന സെക്രട്ടറി ഫാ.ബേസിൽ കരനിലത്ത്,ഭദ്രാസന ജോ സെക്രട്ടറി ബേബി വാളംകോട്ട്,മീഡിയാ കമ്മിറ്റി ചെയർമാൻ ഫാ. സോജൻ വാണാക്കുടി,മീഡിയാ കമ്മിറ്റി കൺവീനർ കെ.എം. ഷിനോജ് എന്നിവർ അറിയിച്ചു.
